ტურიზმის ეროვნულმა ადმინისტრაციამ 592 613 დოლარის ხელშეკრულება გაუფორმა კომპანია VIVAAH WEDDING PARTIES ORGANAZING-ს.
დუბაიში რეგისტრირებულ კომპანიისგან ტურიზმის ადმინისტრაცია მარკეტინგულ სარეკლამო მომსახურებას სამ ეტაპად ერთი წლის განმავლობაში მიიღებს. როგორც ხელშეკრულების დანართებიდან ხდება ცნობილი, სარეკლამო ღონისძიებები ძირითად საქორწინო მიმართულებით საქართველოს პოპულარიზებას ეხება. ღონისძიებები დუბაისა და ინდოეთის სამ ქალაქში გაიმართება: მუმბაიში, დელიში და აჰმედაბადში. კიდევ ერთი ღონისძიების ჩატარება იგეგმება დუბაიში.
შესყიდვების სააგენტოზე გამოქვეყნებული დოკუმენტის მიხედვით, ხელშეკრულების ღირებულება მოიცავს, როგორც მომსახურების, ასევე ხელშეკრულების შესრულებასთან დაკავშირებით გაწეულ ყველა ხარჯს.
სარეკლამო მომსახურება შემდეგ აქტივობებს მოიცავს:
როუდშოუ - დუბაი (არაბთა გაერთიანებული საამიროები):
- განხორციელების პერიოდი: 2026 წლის მარტი;
- აღწერა: დუბაიში როუდშოუს (Road Show) ღონისძიების ორგანიზება 60-100 პოტენციური შემსყიდველისთვის (ქორწილის დამგეგმავები, ღონისძიების ორგანიზატორები).
- მისაწოდებელი სერვისები: ღონისძიების სივრცის დაქირავება, კვებით უზრუნველყოფა (ქეითერინგი), აუდიო-ვიზუალური აღჭურვილობა და ლოგისტიკური მხარდაჭერა B2B შეხვედრებისა და პრეზენტაციებისთვის.
მიკროსაიტის შემუშავება და მართვა:
- სპეციალური B2B მიკროსაიტის დიზაინი, შექმნა და ჰოსტინგი (weddingtouring.ge ან მსგავსი).
- კამპანიის პერიოდის განმავლობაში მიკროსაიტის შინაარსის (კონტენტის) განახლება და ტექნიკური გამართულობა.
ციფრული მარკეტინგული აქტივობები:
- განხორციელების პერიოდი: ივლისი - დეკემბერი 2026
- სამუშაოს მოცულობა (Scope): ციფრული მარკეტინგული კონტენტის შექმნა, ადაპტირება და განთავსება სხვადასხვა სოციალურ ქსელსა და პროფესიულ პლატფორმებზე.
- მართვა: ფასიანი სარეკლამო განთავსებების შესყიდვა და მართვა საერთაშორისო ქორწილის დამგეგმავების (Wedding Planners) მიზნობრივ აუდიტორიად განსაზღვრისთვის.
კომპანიის საიტზე მითითებულია, რომ VIVAAH WEDDING-ი ქორწილების დაგეგმისა და ორგანიზების წამყვანი კომპანიაა, რომელიც კლიენტებს სთავაზობს ქორწილთან დაკავშირებით ყველა ტიპის მომსახურებას: ადგილის შერჩევას, გადაღებას, საქორწილო დეკორაციებს და სხვა სახის მომსახურებას. ასევე საკმაოდ ფართოა იმ ქვეყნების ჩამონათვალი, სადაც როგორც საიტზე ვკითხულობთ, კომპანია ქორწინების ცერემონიას აორგანიზებს.
